Tinanghal na kampeon ng Intercontinental Fight Club (ICFC) Asia Tekken Season 4 Week 8 ang isa sa mga pambato ng Pilipinas na si Omega Jules.
Sa nalalapit na pagtatapos ng ICFC Asia Season 4, nagwagi si Juliano “Jules” Lozano ng Omega Esports sa Week 8 ng nasabing tournament.
Walang naging sagabal sa pagpasok ni Omega Jules sa Top 8 brackets, subalit dito nya natanggap ang kanyang unang talo sa unang round ng Winners Bracket sa kamay ng Japanese Jack-7 player na si Halu sa score na 2-0.
Hindi naging madali ang takbo ng bracket para kay Omega Jules sa losers side. Dito ay nakalaban nya ang ICFC Asia Season 2 champion na si Kuzin na tinalo nya sa score na 2-0.
Sumunod nyang nakalaban sa Losers Quarterfinals ang Japanese pro player at streamer na si TaiHeiYo na kanyang tinalo gamit ang kanyang Bob sa score na 2-1.
Sa Losers Finals, muling nakaharap ng pambato ng Omega ang player na naglaglag sa kanya patungong losers bracket, si Halu. Naging sobrang dikit ng laban ng dalawa, kung kaya’t inilabas na ni Jules ang kanyang main na Jin Kazama.
Umabot ng final round sa Game 5 ng best-of-five series ang laban sa Losers Finals. Maagang lumamang si Halu sa huling round nang tamaan nya ng Killing Uppercut combo si Omega Jules na halos kumalahati sa buhay nito. Nakahbol naman si Jules sa pamamagitan ng isang Thrusting Uppercut combo.
Naging mahigpit ang huling 25 segundo ng round kung saan lamang sa lifebar si Halu. Naagaw ni Jules ang kalamangan nang mapatama nya ang Switch Blade na sinundan naman ng Black Out sa 10-second mark. Dito na nagpakita ng pambihirang depensa ang pambato ng Omega nang ubusin nya ang oras upang kunin ang huling round sa isang Time Over.
Sa linggong ito naganap ang unang All-Filipino Grand Finals sa ICFC kung saan nakatapat ni Jules ang kapwa Pinoy na si Alexandre “AK” Laverez. Mabilis na na-reset ni Jules ang bracket sa score na 3-0 gamit ang kanyang Heihachi.
Sa final round ng huling game ng tournament, tinapos ni Omega Jules ang laban gamit ang Iron Fortress ng kanyang Feng Wei laban sa Geese ni AK sa score na 3-1 upang tanghaling kampeon ng ICFC Asia Season 4 Week 8.
Kasalukuyang nasa ikalawang pwesto ng standings si Jules. At dahil may isang linggo na lamang na natitira sa ICFC Asia Season 4, sigurado nang pasok sya sa Season Finals.
Mapapanood ang mga laban sa ICFC Asia Tekken tuwing Wednesday, 7 p.m. GMT+8 sa Twitch.
